Menejimenti ya Chuo cha Ustawi wa Jamii, leo tarehe 15 Mei, 2026 imewatambua watumishi walioibuka watumishi bora kwa mwaka 2025, pamoja na wale ambao wameitumikia taasisi kwa zaidi ya miaka mitano, kwa kuwapa vyeti na mkono wa pongezi. Akiongea katika hafla hiyo, Mkuu wa Taasisi, Dkt. Joyce Nyoni, amewapongeza watumishi walioibuka bora zaidi katika mwaka 2025. "Kutambua wafanyakazi hodari ni moja ya motisha ya kuleta chachu ya kufanya kazi kwa bidii zaidi, lakini pia ni sehemu ya wengine kuiga mfano ili kupokezana kijiti hiki cha kuwa mfanyakazi bora," amesema Dkt. Joyce. Kwa watumishi wote, naomba niwapongeze sana na kuwashukuru kwa kuwa sehemu ya mafanikio ya taasisi yetu, na niwaombe muendelee kuchapa kazi." Aidha, watumishi wa ISW katika hafla hiyo walipata mafunzo kutoka kwa wataalam kutoka WCF na OSHA kuhusu masuala ya usalama mahala pa kazi, mbinu za kuhakikisha wanakuwa salama katika maeneo ya kazi, pamoja na mafao ya wafanyakazi pale wanapopata ajali au kuumia kazini.

Menejimenti ya Chuo cha Stawi wa Jamii imempa tuzo maalum ya kutambua jitihada na Kazi kubwa anayofanya mwanafunzi wetu Rehema Said kuipeperusha bendera ya nchi na ISW katika michuano ya kitaifa na kimataifa ya mchezo wa tennis (Wheelchair) ambapo tangu mwaka 2020 ameibuka mshindi wa tuzo mbali mbali Afrika na Duniani. Mkuu wa Chuo cha Ustawi wa jamii Dkt. Joyce Nyoni amemkabithi tuzo hiyo Mei 15, 2026 katika hafla ya kuwapongeza watumishi wa ISW waliofanya vizuri mwaka 2025.

Chuo cha Ustawi wa Jamii (ISW), kupitia kituo cha Ubunifu, kimeendesha kwa mafanikio Shindano la Ubunifu wa Dijiti 2026 kufuatia mchakato wa kina uliojumuisha mafunzo, ushauri, fikra za kubuni, na uwasilishaji wa mwisho. Tunazipongeza timu zote zilizoingia fainali kwa uvumbuzi wao bora, kujitolea na mchango wao: Hamia kwa werevu, Kitovu cha Ubunifu cha Huduma, Kitovu cha Ujuzi wa Vijana, Timu ya Big Dreamers, Forward Thinkers, na Future Rise Hub. Baada ya mchuano wenye ushindani, timu zifuatazo ziliibuka Washindi : Kitovu cha Stadi za Vijana - Nafasi ya Kwanza , Hamia Smartly – Nafasi ya Pili, Timu ya Big Dreamers - Nafasi ya Tatu. ISW inatambua kujitolea kwa washiriki wote na inatoa shukrani kwa washirika na wadau kwa kuendelea kuwaunga mkono katika kuendeleza uvumbuzi na maendeleo ya vijana.

Afisa Kazi Mwandamizi Neema Daniel Msyaliha kutoka Idara ya kazi Ofisi ya Waziri Mkuu, Kazi, Ajira na Mahusiano tarehe 23 Machi, 2026 kwa niaba ya Kamishna wa kazi, amezindua Baraza jipya la Wafanyakazi la Taasisi ya Ustawi wa Jamii ambalo litahudumu kwa miaka Mitatu. Katika kikao hicho, Baraza la Wafanyakazi lilipokea na liliwatambua na kuwathibitisha wajumbe wapya kutoka katika idara na vitengo mbali mbali. Katika Hatua nyingine Baraza lilifanya uchaguzi wa katibu na Katibu msaidizi wa baraza hilo jipya na baadaye kujadili masuala mbali mbali ya maendeleo ya Taasisi ikiwepo Dira ya mpango mkakati wa Taasisi pamoja na Kupitia Rasimu ya Bajeti ya Taasisi ya Mwaka 2026/2027.

Watumishi Wanawake wa Chuo cha Ustawi wa Jamii wameshiriki kikamilifu katika maadhimisho ya kilele cha siku ya kimataifa ya wanawake tarehe 8 Machi, 2026, ambapo mgeni rasmi alikuwa Mkuu wa Mkoa wa Dar es Salaam Mh. John Chalamila katika viwanja vya Barafu Mburahati, mkoani Dar es Salaam.

Kuelekea kilele cha Siku ya Mwanamke Duniani, Wanawake wa Chuo cha Ustawi wa Jamii, tarehe 6 Machi 2026, wakiongozwa na Naibu Mkuu wa Chuo Utawala Dkt. Zena Mabeyo wametembelea na kutoa zawadi mbalimbali Zahanati ya Kijitonyama zitakazosaidia kuboresha huduma katika Wodi ya Wazazi. Akizungumza baada ya kupokea zawadi hizo Mganga Mfawidhi wa Zahanati hiyo, Dkt. Faraja Mgana amesema ni heshima na upendo mkubwa ambao wanawake wa ISW wameonyesha kwa wagonjwa wanaopata matibabu kwenye zahanati hiyo, lakini zaidi tendo hili limedumisha mahusiano mazuri na ujirani mwema kati ya Chuo cha Ustawi wa Jamii na Zahanati ya Kijitonyama.

Mkuu wa Chuo cha Ustawi wa Jamii, Dkt. Joyce Nyoni Mkuu amesema familia ni taasisi ya kwanza ya kijamii ambayo binadamu huikuta kabla ya shule, kanisa au msikiti na ajira. Aidha,amesema ndani ya familia ndipo mtoto hujifunza lugha, maadili, heshima pamoja na kujifunza namna ya kuishi na wengine. "Tunaposema familia yangu, Taifa langu” tunamaanisha kuwa ubora wa Taifa ni kioo cha ubora wa familia zake,"alisisitiza. Dkt.Joyce ameyasema hayo leo Machi 6,2026 wakati akiwasilisha mada kuhusu familia yangu Taifa langu katika Kongamano la Wanawake 2026 lililoandaliwa na Shirika la Utangazaji (TBC) kuelekea maadhimisho ya Siku ya Wanawake duniani katika Ukumbi wa Mkataba ya Chuo Kikuu cha Dar es Salaam. Mgeni rasmi katika kongamano hilo alikuwa Waziri wa Maendeleo ya Jamii,Jinsia ,Wanawake na Makundi Maalum, Mh. Dkt.Dorothy Gwajima. "Ikiwa familia zetu zina amani, Taifa litakuwa na amani Ikiwa familia zetu zina misingi ya haki, Taifa litakuwa na misingi ya haki,ikiwa familia zetu zina usawa, Taifa litakuwa jumuishi,"amesisitiza. Aidha,amesema kuwa amani ya Taifa huanzia kwenye amani ya familia na kwamba familia yenye migogoro, dhuluma na ukatili huathiri afya ya akili ya watoto. "Watoto wanaokulia katika mazingira ya vurugu wana uwezekano mkubwa wa kuendeleza vurugu, kukosa utulivu wa kisaikolojia, kushindwa kufikia uwezo wao wa juu,"amesema ambaye kitaalum ni Daktari wa Sosholojia.

Naibu Waziri wa Maendeleo ya Jamii, Jinsia, Wanawake na Makundi Maalum Mhe. Mha. MaryPrisca Mahundi (MB) akiskiliza wasilisho la taarifa ya utendaji wa Chuo cha Ustawi wa Jamii Kampasi ya Kisangara, kutoka kwa Meneja wa Kampasi hiyo Dkt. Leah Mwaisango ikiwa ni sehemu ya pili ya ziara yake ya kukagua na kupata taarifa ya Shughuli mbali mbali za Chuo cha Ustawi wa Jamii. Mhe. Mha. Naibu Waziri Mahundi katika ziara hiyo aliyoifanya tarehe 25 Februari 2026, aliambatana na Uongozi wa Wilaya ya Mwanga, Kamati ya Ulinzi na Usalama na Uongozi wa Kijiji cha Mbambua Kisangara, Mwanga.

Mkuu wa Chuo cha Ustawi wa Jamii Dkt. Joyce Nyoni amepokea ujumbe wa wanafunzi walioshiriki mashindano ya #Shimivuta yaliyofanyika mkoani Tabora kuanzia tarehe 11 hadi 23 Desemba 2025. Katika michuano hiyo timu za wanafunzi wa #ISW zimetwaa vikombe, medali na vyeti vya ushindi kama ifuatavyo; medali ya mshindi wa pili mbio za mita 400 wanawake, kombe la mshindi wa tatu karata, kombe la mshindi wa kwanza mbio za magunia na cheti cha timu yenye nidhamu bora mshindi wa pili. "Ni heshima kubwa kwa chuo kwa ushindi huu mlioupata, ushindi huu uwe mfano na kipimo cha juhudi za kufanya vyema zaidi mashindano yajayo," alisema Dkt. Joyce. Kwa mujibu wa mkuu wa chuo, ameeleza kuwa michezo ni nyenzo muhimu ya kuwafanya wanafunzi kuwa imara na shupavu. Aidha, aliwahimiza kuendelea na mazoezi kwa kuwa michezo huchochea ufaulu katika masomo yenu, huongeza mahusiano mema katika ya vyuo na wanafunzi wenzenu kutoka vyuo mbali mbali. Naye, Selemani Mwenda Kiongozi wa Michezo kutoka Serikali ya Wanafunzi (ISWOSO), amemuahidi Mkuu wa Chuo cha Ustawi wa Jamii kuwa wataongeza ushawishi kwa wanafunzi wengi kushiriki michezo ili kuibua vipaji ambavyo baadaye huzaa ajira na kipato kwa kila mmoja ambacho huchangia maendeleo binafsi na taifa kwa ujumla

Wahitimu wa Chuo cha Ustawi wa Jamii (ISW) wametakiwa kuwa wabunifu na kubadilisha elimu ya huduma za ustawi kuwa biashara ili kujiajira wenyewe huku lengo kuu ni kutatua changamoto zilizopo ndani ya jamii zao. Akizungumza katika Mahafali ya 49 ya Chuo cha Ustawi wa Jamii Kampasi ya Dar Es Salaam na Mahafali ya nane ya Kampasi ya Kisangara kwa niaba ya Waziri wa Maendeleo ya Jamii, Jinsia, Wanawake na Makundi Maalum, Dkt. Dorothy Gwajima, Mkuu wa Wilaya Temeke, Sixtus Mapunda amewaasa kuitumikia taifa kwa utii na uadilifu. "Mkawe wabunifu mkajiongeze dunia imebadilika mahitaji ya wananchi ni mengi Elimu ya saikolojia haikuwa biashara kwasasa inahitajika sana katika jamii zetu na mnapata fedha hivyo tuhamishie huduma za ustawi wa jamii kuwa biashara kuna makampuni na taasisi wanahitaji huduma hizi tuwe na juhudi na kuna matokeo ya juhudi za muda mrefu," amesisitiza Mhe. Mapunda Kwa upande wake Naibu Katibu Mkuu wa Wizara ya Maendeleo ya Jamii, Jinsia , Wanawake na Makundi Maalum Amon Mpanju amesema wahitimu hao katika fani mbalimbali za huduma za ustawi wa jamii watatumika kuisaidia jamii kutatua changamoto zao katika kuleta Ustawi wao. Naye Mkuu wa Chuo cha Ustawi wa Jamii, Dk Joyce Nyoni amesema kwa mwaka wa masomo 2025/2026 Chuo kimeanzisha programu mpya nne ikiwemo masomo na maendeleo ya ujasiriamali, utatuzi wa migogoro kwa njia mbadala, kazi za jamii, watoto na vijana na mafunzo ya makuzi na malezi ya awali kwa watoto. Amesema katika mahafali hayo kuna jumla ya wahitimu 3100 kati yao 2017 ni wanawake na wanaume ni 1083 walitunukiwa tuzo zao katika fani mbalimbali za ustawi wa jamii.

Naibu Mkuu wa Taasisi Mipango, Fedha na Utawala, Dkt. Zena Mnasi Mabeyo akipokea tuzo ya Uandaaji wa Hesabu kwa Viwango vya Kimataifa vya Uhasibu wa Sekta ya Umma (International Public Sector Accounting Standards (IPSAS), kundi la Vyuo vya Elimu ya Juu Tanzania. Katika tuzo hizo Chuo cha Ustawi wa Jamii kimeibuka mshindi wa tatu,ikiwa ni mara ya nane mfululizo toka mwaka 2017 #ISW inashika nafasi za juu kwenye mashindano hayo. Naibu Mkuu wa Taasisi aliambatana na Mhasibu Mkuu, Aisha Kapande Wahasibu na Wakaguzi wa Hesabu za Ndani kutoka Chuo cha Ustawi wa Jamii. Tuzo hizo zimetolewa na Bodi ya Taifa ya Wahasibu na Wakaguzi wa Hesabu (NBAA) usiku wa tarehe 04/12/2025 katika ukumbi wa APC Bunju, jijini Dar es Salaam.

Mkutano wa 5 wa Wadau na Wanafunzi wa Uanagenzi kutoka Chuo cha Ustawi wa Jamii umefanyika katika Kampasi ya Dar es salaam, ukiwakutanisha wamiliki wa Taasisi mbalimbali pamoja na Wanafunzi wanaotarajia kuanza mafunzo ya vitendo kupitia programu ya uanagenzi. Mkutano huu umefanyika kuanzia tarehe 2 – 5 Desemba, 2025. Kwa mwaka huu, programu ya uanagenzi imetimiza miaka mitano tangu kuanzishwa kwake, na imeendelea kuchangia kwa kiasi kikubwa katika kuwaandaa wanafunzi kupitia uzoefu wa moja kwa moja kazini, kuimarisha ujuzi wa kiutendaji, na kupanua mtandao wao wa kitaaluma kama sehemu ya maandalizi ya kuingia kwenye soko la ajira.

Chuo cha Ustawi wa Jamii (ISW) kimeingia makubaliano na One Tanzanite Football Academy ya kuboresha Viwanja vya michezo #ISW Makubaliano hayo yameingiwa leo tarehe 11 Novemba, 2025 kati ya Dkt. Joyce Nyoni, Mkuu wa Chuo cha Ustawi wa Jamii pamoja na Bw. Agapiti Emmanuel, Mkurugenzi Mtendaji wa One Tanzanite Football Academy. Makubaliano hayo yameshuhudiwa na Timu ya Menejimenti ya #chuochaustawiwajamii na Baadhi ya maafisa kutoka One Tanzanite Football Academy.